- 435 -

1408. Juli 11. Liegnitz.

Herzog Ruprecht belehnt die Gebrüder Heseler zu Liegnitz mit ihren väterlichen Gütern Waldau, Wiltschütz, Schmöckwitz, Scheibsdorf und einen Theil von Wolfsdorf.

In gotis namen amen. Wir Ruprecht von gotis gnaden in Slesien .. herczog vnde herre czu Legnicz vnde zum Goltberge bekennen vffenlichen mit desem briue allin den, die in sehin odir horen lesen, das für vns seyn komen vnser getrowen her Lucas Heseler scolasticus czu Legnicz vnde siene bruder Hannos, Urban vnd Ruland ires brudirs Marcus son vnde habin vns demutlichin mit fleisse gebeten, das wir in die hernochgeschrebin guter gebuchten das gancze dorff Waldow, alle ire gut zu Wiltschicz, das vorwerk zu Schmochewicz mit allen sienen zugehorungen, das gut Schibansdorff mit allen sienen zugehorungen, ire vorwerk vor dem Goltberg mit allin sienen czinsen vnde zugehorungen, eyn fierteil des dorffis zu Wolffdorff mit sienen zugehorungen vnde alle andir ire erbliche gueter vnde zu wedirkowffe die von irem vatir Petir Heseler seligis gedechtniss in vnserm lande zu Legnicz vnd zum Goltberge uff sie komen vnde geerbit sien, zu gesampten lehnen zu lihen vnd zu reichen des habin wir ire getrawe dienste, die sie vns vnde ire vatir dicke vnde vil geton haben vnde noch wol tun sollen vnd mogen, angesehen vnde habin mit rate vnser getrawen eldisten von vnsers selbis vnd von des hochgebornen fursten vnde herren herczoge Wenczlaws vnsers lieben brudirs wegen, derdo von gotis gnaden mit vns erpherre ist zu Legnicz vnde zum Goltberge, die obgenanten guetirn, das dorff zu Waldow, ire gut zu Wiltschicz, das vorwerk zu Smochewicz, das gut Schibansdorff, ire vorwerk vor dem Goltberge, Kopatsch genant, mit allin sienen czinsen vnde zugehorungen vnde eyn fierteil des Dorfiis zu Wolffdorff vnde alle andir erbliche gueter vnde zu widerkowffe die, sie zu Legnicz vnd zum Goltberge ym lande habin, die von irem vatir vff sie komen vnd geerbit sien noch der alden briue laute, die do vormols dorobir gegebin sien, den obgenanten herren Lucas, Hannos, Urban gebrudern vnde Rulande ires brudirs Marcus son Hezeler genant, iren erben vnde rechten nochkomlingen zu gesampten lehnen gelehin, gereicht, lihen vnde reichin ewiclichin zu habin, zu besiczen, zuvorkewffen, zuvorgebin vnde domete zu tun vnd zu lassen vnde doczu vornawen vnd bestetigen wir in dieselbin briffe obir die vorgenante guter in crafft dis briues. Des zu sichirheit habin wir in desen briff lassen vorsigiln mit vnserm ingesigile zu Legnicz. Noch Crists geburde vnsers herren fierczehnhundirt jare donoch ym achtten jare an der mittewoche vor sante Margarethen tage. Dobie sien gewest vnser getrowen Niclas Vngeraten, Nickil Vyow, Niclas Slewicz, Wilrich Guske, Nickil Meys, Hannos Tenscheler vnde Johannes Alczenaw vnser schriber, dem wir desen briff beuolen.

O. d. St. L. No. 224. Das vorige Siegel an Schnüren von rother und weisser Seide. — Liegn. Archiv- Acten, No. 1256. S. 141. 83.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866